Dili, 23 de Fevereiru 2026 – Ho preparasaun ba 2026 Asian Beach Games ne’ebe intensifika ba beibeik, Timor-Leste hametin tan nia kompromisu ba desportu mos liuhusi realizasaun Workshop Edukasaun Anti-Doping dahuluk iha tinan 2026. Komisaun Nasional Desportu (KND) iha kolaborasaun ho Komité Olímpiku Nasional Timor-Leste (KONTL), realiza atividade refere iha loron 23 Fevereiru ba atleta no treinadór sira ne’ebé elijível atu partisipa iha Sanya, Xina ina husi 22 to’o 30 Abril 2026. Inisiativa ida-ne’e hatudu determinasaun nasaun nian atu garante katak delegasaun Timor-Leste kompete ho integridade no kompriende didi’ak nia obrigasaun sira kona-ba anti-doping iha nivel Ázia.
Sesaun ne’e fornese edukasaun kompriensivu kona-ba prosedimentu kontrolu doping, Lista Proibida, risku sira ne’ebé relasiona ho suplementu, no prosesu Autorizasaun Uzu Terapéutiku (AUT). Workshop ida-ne’e subliña direitu no responsabilidade atleta nian, inklui prinsípiu responsabilidade estrita (strict liability), ne’ebé hateten katak atleta rasik mak responsável ba substánsia proibida ne’ebé hetan iha nia isin/sistema. Adisionalmente, destaka mos papél importante husi Pesoal Apoiu Atleta (PAA), inklui treinadór no ekipa ofisiál sira, iha protesaun desportu moos no apoiu atleta sira atu kumpri sira-nia obrigasaun.
Nu’udar rekizitu mandatóriu ba atleta no treinador sira atu bele kompete iha eventu internasional sira, delegasaun tenke hetan sertifikasaun anti-doping ba Atleta Nive;-Internasional (ILA) no no Treinadór Nivel-Ass (CHP). KND konfirma katak 100% husi atleta no treinadór sira kompleta no hetan sertifikasaun refere antes Sanya 2026. Ho envolvimentu forte no diskusaun ativu durante workshop, delegasaun Timor-Leste hatudu prontidaun la’ós de’it atu hatudu rezultadu, maibé mos atu mantein padraun aas liu kona-ba justisa no integridade iha Sanya 2026.