Dili, 23 January 2026 – Komisaun Nasional Desportu (KND), ne’ebé reprezenta husi Sra. Kerry Galhós, partisipa iha Enkuadramentu Edukasaun Global ba Aprendizajen no Dezenvolvimentu (GLDF) ne’ebé hala’o iha tinan 21-23 Janeiru 2026 iha Tokyo, Japaun, hafoin sesaun pre-introdusaun iha loron 13 Janeiru ba nasaun sira iha rejiaun Azia no Oseania. Formasaun ne’e organiza husi Ajensia Anti-Doping Japaun (JADA) ne’ebé lidera husi Ajensia Anti-Doping Mundial (WADA). Programa ida-ne’e ninia objetivu mak atu hametin kompeténsia Ofisial Edukasaun no jestór sira-nian iha preparasaun ba implementasaun Kódigu Mundial Anti-Doping 2027 no revizaun ba Padraun Internasional Edukasaun (ISE).
Durante formasaun loron tolu, partisipante sira halo revizaun estruturada ida kona-ba rekizitu ISE nian no halo avaliasaun ba medida pratika sira ba implementasaun efetiva iha nivel nasionál. Liu husi workshop interativu no diskusaun, reprezentante sira husi Organizasaun Nasional Anti-Doping (NADOs) iha Azia no Oseania fahe esperiénsia, identifika dezafiu sira, no explora estratéjia sira atu hasa’e kualidade no impaktu husi programa edukasaun desportu moos.
KND konsidera partisipasaun iha programa ida-ne’e nu’udar atinjimentu importante ida hodi hametin Timor-Leste nia sistema edukasaun anti-doping. Koñesimentu no instrumentu hirak ne’ebé hetan husi formasaun GLDF nian sei apoia dezenvolvimentu planu edukasaun ida-ne’ebé estratéjiku, bazeia ba valór no sustentavel liu, aliña ho padraun internasionál sira, hodi reforsa kompromisu Timor-Leste nian ba integridade no desportu moos.
