Dubai, 23 Maiu 2024 — Timor-Leste partisipa iha Reuniaun Ministerial Azia/Oseania ba dala-20 kona-ba Antidopajen iha Desportu (AORIM), ne’ebé hala’o iha Dubai iha loron 22-23 Maiu 2025. Reuniaun ida-ne’e halibur hamutuk Ministru sira, ofisiál governu sira, no reprezentante sira husi Organizasaun Nasional no Rejional Antidopajen (NADOs no RADOs) iha rejiaun Azia/Oseania hodi promove desportu moos no justu. Delegasaun Timor-Leste inklui Sr. Nelyo Isaac Sarmento, Ministru Juventude, Desportu, Arte no Kultura (MJDAK), Sr. Cesarino da Silva, Sekretariu Ezekutivu Komisaun Nasional Desportu (KND), no Sra. Kerry Galhós, Jestora Programa Antidopajen.
Reuniaun refere prezide husi Dr. Mai Ahmed Sultan Essa AlJaber, Prezidente Ajensia Nasional Antidopajen Emiradus Árabes Unidus (UAE NADA), ne’ebé foka liu ba implementasaun Kódigu Mundial Antidopajen 2027 no Padraun Internasional, hametin governasaun no independénsia operasionál husi NADO sira, no suporta programa edukasaun atleta sira tuir prinsípiu “Edukasaun Molok Kontrolu Dopajen.” Diskusaun sira mós ko’alia kona-ba enkuadramentu legál, finansiamentu, no kooperasaun rejionál hodi defende desportu moos.
Reuniaun ida-ne’e ko’alia liu kona-ba eventu bo’ot sira iha rejiaun, inklui Asian Youth Games iha Bahrain (October 2025) no Reuniaun iha Katar (Dezembru 2025), ne’ebé ko’alia liu kona-ba importánsia edukasaun pre-eventu ba atleta no pesoál apoiu sira. Partisipasaun Timor-Leste nian reflete kompromisu nasaun nian ba inisiativa antidopajen no apoiu ba esforsu rejionál sira atu mantein integridade desportu nian, ho planu atu atende Reuniaun Ministerial Azia/Oseania ba dala-21 iha 2026.