Dili, 11 Outubru 2025 – Komisaun Nasional Desportu (KND), iha kolaborasaun ho Komité Olímpiku Nasional Timor-Leste (KONTL), realiza workshop ida-ne’ebé hala’o durante loron ida kona-ba Anti-Doping Education and Learning (ADEL) ba atleta no pesoal apoiu atleta sira ne’ebé prepara hodi reprezenta Timor-Leste iha Asian Youth Games (AYG) 2025 iha Bahrain, ne’ebé sei hala’o husi 22 to’o 31 Outubru 2025.
Workshop ida-ne’e ninia objetivu mak atu asegura katak partisipante hotu-hotu kumpre espetativa Olympic Council of Asia’s (OCA) no atleta no pesoál apoiu sira hetan sertifikasaun ADEL molok partisipa iha eventu refere. Workshop ida-ne’e mos buka atu hametin partisipante sira-nia koñesimentu kona-ba Violasaun Regras Antidopajen (ADRVs), prosesu teste kontrolu dopajen, no direitu no responsabilidade atleta no ekipa apoiu sira-nian, no mós promove valór desportu moos.
Inisiativa ida-ne’e reflete Timor-Leste nia kompromisu atu promove prátika desportiva moos, justu no etiku tuir padraun internasionál sira. Ida-ne’e forma parte ida husi programa nasionál ne’ebé luan liu atu eduka atleta no treinador sira kona-ba integridade iha desportu no reforsa dedikasaun nasaun nian hodi apoia valór kompetisaun justu.
