Komisaun Nasional Desportu (KND) foin lalais hala’o workshop anti-doping lubuk ida husi loron 13 to’o loron 23 fulan-Novembru ba munisípiu Aileu, Ermera, Bobonaro, Likisa no Manatuto. Inisiativa ida-ne’e ho objetivu atu hasa’e konsiénsia entre atleta sira, treinador sira, no parte interesada sira husi organizasaun desportiva sira kona-ba importánsia desportu moos no efeitu negativu husi doping.
Workshop sira-ne’e hetan interese no entuziazmu bo’ot husi organizasaun desportiva lokál sira. Hodi hatán ba sira-nia pedidu sira, KND extende programa ne’e ho sesaun adisionál rua iha loron 9 no 10 Dezembru iha postu administrativu Balibo no Atabae iha Munisipiu Bobonaro. Sesaun adisionál sira-ne’e hetan partisipasaun masimu husi atleta no pesoal apoiu atleta sira, hodi hatudu liután komunidade sira-nia hakarak atu aprende no kompromisu atu mantein integridade iha desportu.
Durante workshop hirak-ne’e, partisipante sira envolve iha diskusaun interativu kona-ba regra anti-doping, perigu husi substánsia bandu sira, no papél edukasaun iha promosaun desportu moos. Sesaun hirak-ne’e subliña kompromisu KND nian atu promove ambiente desportu ida-ne’ebé justu no transparente iha Timor-Leste.
KND hato’o nia agradesimentu ba organizasaun desportiva lokál no autoridade administrativa sira tanba sira-nia kolaborasaun no apoiu hodi halo inisiativa ne’e sai susesu. Momentu ida-ne’e sei hametin duni esforsu sira ne’ebé la’o hela atu asegura integridade no justisa iha desportu iha nasaun laran tomak.
