Iha loron Kuarta, 19 fulan Juñu tinan 2024 iha Salaun treinamentu Xanana Sport Center Dili, Komisaun Nasional Desportu (KND) realiza tan formasaun Anti-Doping Education & Learning (ADEL) ba jogador futebol sub-19 hamutuk na’in 29 ho treinador na’in 1, total partisipante iha treinamentu ADEL hamutuk na’in 30 durante loron tomak.
Jogador sira ne’e tuir planu FFTL nian iha fulan Jullu nia laran sei ba partisipa jogu AFC iha Surabaya, Indonesia. Tanba ne’e KND identifika katak nesesita duni atu sira partisipa iha programa edukasaun anti-doping nian antes ba partisipa iha eventu internasional sira ho objetivu mak atleta no treinador sira iha koñesimentu konaba anti-doping iha desportu nian ka oinsa atu hadook sira nia-an hosi aktu sira doping ninian no kaer metin ba valores hosi desportu nian mak hanesan jogu moos (clean sport), Play true, Fair Play no seluk tan.
Treinamentu ida ne’e fasilita hosi Sra. Kerry Galhós nu’udar edukador no jestora ba programa anti-doping iha Timor-Leste.