Reuniaun Comissão Nacional do Desporto (CND) deside sei estabelese Agensia Nasional Anti-Doping iha Timor-Leste

CND liu hosi reuniaun ordináriu nebe realiza dala ida kada fulan 3 (tolu) iha salaun MJDAC deside ona atu harii Agensia Nasional Anti-Doping iha Timor-Leste (ANAD-TL). Reuniaun refere realiza iha loron Kinta, 29 fulan Fevereiru tinan 2024 no hetan partisipasaun máximu hosi komisariu sira hodi koalia konaba agenda importante sira mak hanesan:

1. Deside modalidade desportiva no atletas nebe sei ba partisipa iha jogus olimpikus no paraolimpikus tinan ida ne’e iha Paris-França;
2. Deside estabelesimentu Agensia Nasional Anti-Doping nian iha Timor-Leste;
3. Deside atribui premiu ba treinador nain rua hosi paralimpiku nian nebe tinan kotuk sidauk hetan premiu no subsidiu bolsa ba atleta Delio nebe sei kontinua hela estudu iha universitariu.

Relasiona ho estabelesimentu Agensia Nasional Anti-Doping iha Timor-Leste komisarius CND deside hodi parte juridiku MJDAC sei prepara uluk esbosu estatutu no/ka dekretu lei ida hodi haforsa baze ba estabelese ANAD-TL ne’e. Aleinde prepara esbosu refere CND mos iha tempu badak sei ba halo estudu vizita ida iha SEARADO-Singapore no ADAMAS-Malaysia hodi hetan esperiensia nomos atu hetan apoiu hosi SEARADO konaba assistensia ba realiza teste anti-doping iha Timor-Leste nomos hetan assistensia konaba laboratorium nebe sei halo analiza ba rezultadu teste hosi Timor-Leste nian.

CND-MJDAC