Dili, 28 Juñu 2024 – Confederação do Desporto de Timor-Leste (CDTL), servisu hamutuk ho Ministeriu Desportu Juventude Arte no Kultura (MJDAC), hala’o Simpoziu Nasional Kona-ba Anti-Doping 2024 iha Sexta, 28 Juñu. Simpoziu refere konta ho partisipasaun husi atleta sira, treinador sira, lider sira husi Federasaun Nasional, reprezentante Governu sira, Polisia Nasional, Universidade Nasional Timor Lorosa’e (UNTL), no klínika sira, sira hotu halibur hamutuk hodi fahe informasaun kona-ba anti-doping no advokasia ba estabelesimentu autoridade ida atu regula esforsu anti-doping iha futuru.
Simpozio ne’e konta ho série aprezentasaun interesante lubuk ida husi palestrante sira:
- Dr. Eka Wulan Sari husi Organizasaun Anti Doping Indonezia (IADO) diskute kona-ba “Regra no Governasaun, Disclosure Kazu no Edukasaun Anti-Doping”
- Dr. Nilton dó Carmo da Silva fó informasaun kona-ba “Doping and Sports Medicine”.
- Dr. Gustodio Alves dé Jesus ko’alia kona-ba “Cardiac Arrest During the Game: What are the Causes?”
- Sr. Cesarino da Silva, Sekretariu Ezekutivu SNK, ko’alia kona-ba “Esbosu Dekretu-Lei Kona-ba Estabelesimentu NADO Timor-Leste.”
Tema husi Simpoziu Nasional Anti-Doping 2024 mak atu promove no garante clean sport ba prestasaun. Simpoziu ne’e subliña importánsia atu mantein integridade iha desportu no subliña nesesidade ba autoridade dedikada ida atu tau matan ba regulamentu anti-doping iha Timor-Leste.
Partisipante sira hato’o sira-nia apoiu ba inisiativa ida ne’e, hodi rekoñese papél krítiku husi medida anti-doping hodi asegura kompetisaun ne’ebé justu no proteje atleta sira-nia saúde. Eventu ne’e marka pasu signifikativu ida hodi hasa’e enkuadramentu anti-doping iha Timor-Leste no reforsa kompromisu nasaun nian ba desportu ne’ebé moos no etiku.
