Dili, 27 Fevereiru 2025 – Komisaun Nasional Desportu (KND) hala’o ho susesu formasaun dahuluk iha 2025 kona-ba Anti-Doping Education and Learning (ADEL) ba Ekipa Nasional Mane Timor-Leste, ne’ebé sei kompete iha Kualifikasaun Tasa Ázia AFC 2027. Inisiativa ida-ne’e marka pasu importante ida hodi promove desportu ne’ebé moos no asegura kumprimentu ba regulamentu internasionál anti-doping.
Formasaun refere konta ho partisipasaun husi figura prinsipál sira iha setór futebol Timor-Leste nian, Sekretariu Jeral Federasaun Futebol Timor-Leste (FFTL), Sr. José Adilson Ribeiro; Diretor Selesaun Nasional FFTL, Sr. João Maneco Amaral; Diretor Arbitrajen FFTL, Sr. Nivio Fernandes; no Diretor Tekniku FFTL, Sr. Gaspar Quintão da Silva, Partisipante hamutuk 40, inklui mós ekipa nasionál no ofisiál sira, partisipa iha sesaun ne’e.
Programa ne’e inklui aprezentasaun kona-ba saida mak atleta no pesoál apoiu atleta sira presiza hatene kona-ba Anti-Doping, tuir kedas ho sesaun formasaun ADEL nian, iha ne’ebé atleta sira kompleta módulu Atleta Nivel-Internasional no Treindador Nivel-Profisional atu hetan sertifikasaun. Formasaun ne’e asegura katak membru ekipa hotu-hotu komprende importánsia husi kompetisaun ne’ebé moos no halo tuir regulamentu anti-doping molok sira-nia partisipasaun iha Kualifikasaun Tasa Ázia AFC 2027.
Inisiativa ida-ne’e reflete Timor-Leste nia kompromisu atu hametin edukasaun anti-doping no apoia jogu justu iha futebol internasionál. KND ninia objetivu mak atu kontinua habelar programa edukasaun sira-ne’e iha modalidade desportu oin-oin iha Timor-Leste.