Preparasaun finál ba Fórum Antidopajen, ne’ebe sei hala’o iha loron Segunda-feira, 21 Jullu 2025, iha Centro de Convenções de Dili (CCD). Organiza husi Komisaun Nasional Desportu (KND) ho kolaborasaun ho Autoridade Antidopajen Portugal (ADoP), fórum ne’e sei halibur atleta, treinador, estudante no ofisiál desportu sira atu hametin Timor-Leste nia kompromisu ba desportu moos.
Programa interativu ida-ne’e sei hahú ho aprezentasaun vídeo ida kona-ba kazu doping iha vida real, tuir kedas ho introdusaun kona-ba Violasaun Regra Antidopajen (ADRV). Partisipante sira sei halo rotasaun liu husi estasaun temátika lima ne’ebé kobre tópiku prinsipál sira:
* Sistema anti-doping globál no papél WADA, NADO, RADO no IF sira;
* Lista Proibidu, verifika ai-moruk no suplementu, no Autorizasaun Uzu Terapeutiku (TUE);
* konsekuénsia dopajen ba saude, finanseiru no karreira;
* Prosesu kontrolu dopajen no direitu no responsabilidade atleta;
* Denunsia kona-ba dopajen, edukasaun antidopajen, no asesu ba informasaun kredivel sira.
Forum ne’e sei remata ho Mural Kompromisu ba Desportu Moos no kuiz interativu ida ho prémiu hodi enkoraja partisipante sira atu publikamente kompromete ba valór desportu justu no livre husi dopajen.