Iha Sabadu, loron 1 fulan-junu, Sra. Nazima Kazsim, formadora Ofisial Kontrolu Doping (DCO) husi SEARADO, hala’o Kursu Refresher via online ba Ofisial Kontrolu Doping na’in haat (4). DCO sira ne’ebé marka prezensa mak Sra. Benvinda Alves, Sra. Milnocia Ribeiro, Sr. Domingos Gusmão, no Sr. Joao Mendonça.
Sesaun online ne’e serve hanesan faze inisiál, ho sesaun prezensial ne’ebé sei hala’o iha Sabadu, loron 8 Junu 2024. Ho razaun tanba sira hetan akreditasaun iha Dezembru 2022, entaun DCO sira presiza hetan kursu refresher. Objetivu husi Kursu Refresher ne’e mak atu reforsa kompriensaun DCO sira-nian kona-ba sira-nia responsabilidade no asegura katak sira prontu atu hala’o teste kontrolu doping ho efetivu.
Ofisial Kontrola Doping hala’o papél importante ida iha kombate hasoru doping iha desportu. Sira iha kna’ar atu halibur no halo prosesu ba amostra urina ka ran husi atleta sira, iha kompetisaun ka fora-husi-kompetisaun. Sesaun hirak-ne’e esensiál tebes atu mantein integridade no konfiabilidade ba medida anti-doping, no asegura katak ofisiál sira-ne’e atualiza ona ho protokolu no prosedimentu atual.
Ho sesaun prezensial iha tempu badak, DCO Timor-Leste kontinua hatudu sira-nia kompromisu atu mantein padraun integridade no justisa ne’ebé aas liu iha desportu.