Dili, 21 Junu 2025 – Fórum Antidopajen CPLP hala’o iha Centro das Covenções de Dili (CCD) nu’udar parte husi programa ofisiál XII Jogos Desportivos da CPLP 2025 nian. Eventu ne’e organiza husi Komisaun Nasional Desportu (KND) ho kolaborasaun ho Autoridade Antidopagem de Portugal (ADoP) no halibur atleta, treinador, ofisiál no konvidadu internasionál sira husi nasaun Lusófona. Fórum ne’e hetan onra husi prezensa Prezidente ADoP, Sra. Maria João Cascais no Diretor Ezekutivu ADoP, Sr. António Júlio Nunes.
Objetivu husi Fórum ida-ne’e mak atu hasa’e konsiénsia no eduka partisipante sira kona-ba importánsia desportu moos, prevensaun dopajen, no responsabilidade atleta no pesoál apoiu sira atu mantein integridade iha desportu. Eventu refere realiza ho estasaun temátika interativu lima (5), inklui sesaun sira kona-ba sistema antidopajen global no papél WADA, NADO, RADO no IF sira, Lista Proibidu, Autorizasaun Uzu Terapeutiku (TUE), prosesu kontrolu dopajen, direitu no responsabilidade atleta, edukasaun antidopajen, no konsekuénsia sira husi violasaun dopajen. Destake espesiál ida mak kestionáriu antidopajen, ne’ebé partisipante sira koko sira-nia koñesimentu iha ambiente ida-ne’ebé divertidu no kompetitivu. Kestionáriu ida-ne’e enkoraja aprendizajen ativu – reforsa mensajen xave sira ho maneira ne’ebé agradável no memorável.
Fórum ne’e sai hanesan plataforma ida atu fahe koñesimentu, kooperasaun no diálogu entre nasaun membru CPLP sira. Reforsa kompromisu koletivu rejiaun nian atu proteje atleta sira-nia saúde no asegura kompetisaun ne’ebé justu. KND hato’o ninia apresiasaun kle’an ba ADoP ba sira-nia apoiu no parseria kontinua, hodi subliña importánsia husi kolaborasaun internasionál hodi harii programa antidopajen ne’ebé forte no efetivu.