Estudante Colégio Santo Inácio de Loiola – Kasait hamutuk ema na’in 40 partisipa iha Workshop Anti-Doping iha loron 13 fulan Abril tinan 2024 iha sala Laboratorium CSIL. Estudante sira hetan informasaun hosi fasilitador sira durante oras 2 nia laran hodi partilla konaba saida mak Doping no Anti-Doping no konsekuensia saida wainhira uza doping ne’e rasik.
Komisaun Nasional Desportu liu hosi programa anti-doping nian realiza workshop ida ne’e tanba Timor-Leste liu hosi parlamentu nasional ratifika ona konvensoens internasional hosi UNESCO konaba luta kontra dopajen nian, hahú kedas iha tinan 2016 nomos tanba Dekretu Lei Nu.60/2022 konaba kria Komisaun Nasional Desportu nian existe ho Komité Étika no Dopajen iha Desportu.
Atividade workshop konaba Anti-Doping nian hala’o ba estudante sira tanba Komisaun Nasional Desportu identifika katak eskola sira ne’e iha pratika atividade fizika no desportu, liu-liu iha eskola Colégio Santo Inácio de Loiola Kasait nebe kada tinan sempre realiza Loiola Cup iha sira nia eskola, nune’e estudante barak gosta pratika desportu, tanba ne’e importante tebes estudante sira ne’e hetan informasaun konaba saida mak doping no oinsa luta kontra doping iha desportu nian.
Iha sorin seluk atu aliña ho planu Ajensia Mundial Anti-Doping (WADA) nian husu atu Timor-Leste mos hala’o atividade barak liu iha edukasaun anti-doping nian iha nivel hotu-hotu, hanesan ba atleta sira, federasaun nasional desportu nian, komunidade, inan aman sira, inklui professores no estudante sira.