Juñu 29, 2024 – Sekretariu Ezekutivu Comissão Nacional do Desporto (CND), Sr. Cesarino da Silva, no Jestora Programa Anti-Doping, Sra. Kerry Galhós, hala’o enkontru ho Sekretaria Jeral Organizasaun Anti Doping Indonezia (IADO), Dr. Eka Wulan Sari, no Sra. Putri Ayu husi Ekipa Juridika IADO. Sorumutu ne’e foka liu ba hasa’e kooperasaun iha área prinsipál sira husi inisiativa anti-doping, hanesan Izensaun Uzu Terapeutiku (TUE), Komite Izensaun Uzu Terapeutiku (TUEC), no Komite Jestaun Rezultadu (RMC).
Diskusaun hirak-ne’e ho objetivu atu hametin esforsu kolaborativu sira hodi asegura jogu no integridade iha desportu liu husi prosedimentu no jestaun di’ak liu ba TUE no RM. Parte rua hato’o sira-nia kompromisu atu promove enkuadramentu anti-doping ida-ne’ebé forte hodi suporta atleta sira no apoia valór desportu ne’ebé moos.
Detallu liu tan kona-ba rezultadu no pasu sira iha tuir mai sei komunika bainhira kolaborasaun la’o ba oin.