Dili, 11 Jullu 2025 – Iha preparasaun ba XII Jogos Desportivos da CPLP nian iha tinan 2025, atleta no treinador Timor-Leste sira partisipa iha sesaun edukasaun antidopajen ne’ebé hala’o iha Hotel The Ramelau. Formasaun refere organiza husi Komisaun Desportu Nasional (KND), realiza ba dahuluk kursu Atleta Talentozu Ne’ebe Kompete iha Eventu Bo’ot (TAME) iha lian Tetun, ne’ebé marka pasu istóriku ida ba edukasaun desportu moos iha ita nia nasaun.
Kursu ida-ne’e tradús ba lian Tetun hodi asegura asesibilidade no kompriensaun di’ak liu entre atleta lokál sira. Partisipante sira explora tópiku antidopajen xave sira, inklui sistema anti-doping globál, lista bandu, uzu ai-moruk no suplementu, prosesu kontrolu dopajen, direitu no responsabilidade atleta, no konsekuénsia husi doping.
Partisipante sira ne’ebé kompleta ona kursu ne’e hetan sertifikasaun ofisiál husi WADA, hodi hatudu sira-nia prontidaun atu kompete ho moos no apoia valór sira husi jogu justu iha XII Jogos Desportivos da CPLP.